Kuvendi i Kosovës nesër do të mbajë dy seanca, ku njëra nga to do t’i kushtohet 25-vjetorit të Betejës së Kosharës.

Ndërkaq në seancën e rregullt në rend dite janë 39 pika.

Në mesin e tyre janë: Votimi i Projektligjit nr.08/L-236 për ratifikimin e Traktatit ndërmjet Republikës së Kosovës dhe Mbretërisë së Danimarkës për shfrytëzimin e institucionit korrektues në Gjilan me qëllim të ekzekutimit të dënimeve daneze; Votimi në lexim të dytë i Projekt Kodit doganor dhe të akcizave, nr. 08/L-247; Votimi në lexim të dytë i Projektligjit nr.08/L-212 për shëndetin riprodhues dhe fertilizim të asistuar mjekësor.

Gjithashtu në rend të ditës bëjnë pjesë edhe Votimi për themelimin e Komisionit Hetimor Parlamentar mbi përgjegjësitë ekzekutive të Ministrisë së Drejtësisë në raport me zjarret e dyshimta në Institutin e Mjekësisë Ligjore, zhdukjen e mostrave në rastin e Astrit Deharit dhe çdo veprimi e mosveprimi të kësaj ministrie që ka cenuar pavarësinë dhe përgjegjësitë ligjore të këtij instituti.